في النفاق

أحمل صخور الهرم فوق ضهري للشلال

وانقل مياه المحيط للبر بالغربال

واجمع براغيت في ليلة ملو ألف شوال

ولا اقول للحرامي البلطجي يا شريف

ولا اقول للمخنث في الغنا يا ظريف

وبعض أهوال تتفضل على أهوال

***

وآكل حدود الشجر في الطقة ميت قنطار

واشرب ورا كل طقة ميت طن مية نار

واجعل فراشي وغطايا غابة من صبار

أهون على النفس من وقفة في يوم الضنك

على مدير بنك يوهب كل ما في البنك

ده العز والجاه بيتبهدل بنص فرنك

والشرك بالله متسجل بنص ريال

***

عجبي على ناس يعيشوا في النفاق والزور

ويمسحوا الجوخ للمنفوخ والمغرور

ويوهبوا الروح لمجرم من بتوع الطور

علشان ما ياكلوا غداهم في طبق بنور

قيمة الهنا والغنا لو يطفحوا في ماجور

ولا يعيش الكريم عيشة سؤال في سؤال

وكارت من كان ندل يسعى به إلى أندال

***********

*هذه القصيدة من قصائد الرائع بيرم التونسي