يا بلاد العز يا بنت الإيه
فعلك في الناس لا يُعلى عليه
الشحات يرجع منك بيه
ويحقق حلمه قوام بدري
********
ناس تتداين علشانك كوم
وتقضي ايامها ف كنفك صوم
تحفى وتتعرى عشان ما ف يوم
ترجع تتمنظر ع الفقري
********
وناس تتبهدل بس بتصبر
بعديها بتكبش وبتهبر
ده الصبر كسور ياما بيجبر
والعز على الصبر بيغري
********
وناس تتعب فيكي وبتلاقي
والدور والرك على الباقي
عاملين زي عجول في سواقي
ولا خطوة تزيد مهما بتجري
********
وناس مرتاحه تحب تجرب
بتسيب أهاليها وتتغرب
وما تستغربشي ده الأغرب
بتفتح وياهم ع البحري
********
يا بلاد ما بتخلصشي فلوسها
أراضيها الناس تحفى تدوسها
وتوطي على ابدبها تبوسها
وترابها لو ياكلوه يمري
********
يا بلاد بتهادي وبتدي
ودي أهالينا كمان ودي
واديهم واوعاكي تعدي
لحسن تتغاظي وتتقهري
********
يا خليج ربي يخلي دوامك
ويعلي ف راتبك ومقامك
ويكتر مننا خدامك
لحد السبعين مليون مصري
********
هيثم مكارم(الموءود)
