الحلم باقي

ضاع اللي ضاع منِكْ

والحلم باقي لم يزلْ ..

حرقوا عيدان قُطنِكْ

بس الأمل خيطْ ما انغزلْ ..

وان شوهوا حُسنِكْ

برضُو وجبْ فيكي الغزلْ ..

ده اللي افترش حضنِكْ

واتغطى بإديكي ..

مهما بعدْ عنِكْ

لازم يعود ليكي ..

يقعُدْ على جفنِك

يتوضا ف عنيكي ..

أُمُه وهو ابنِكْ

ازاي يوفيكي ..

مهما عملْ .. ولا بذلْ

ما انتي بتدي من الأزلْ

لا يوم عاتبتي ابن خابْ

ولا يوم زعلتي من اللي غابْ

ولا يوم حرمتي اللي اعتزلْ

--------

هيثم مكارم